Milli Ordumuzun güclü, qüdrətli olması işğal altında olan torpaqlarımızın azad olunmasına gedən yoldur - Vüqar Rəhimzadə

18/12/2018 - 17:54 1 093 0   0  

Ordunun güclü, qüdrətli olması Azərbaycan dövlətinin qüdrətli və güclü olması deməkdir. Təbii ki, ordu ilə bağlı qarşıya qoyulan vəzifələr prioritetdir və buna nail olmaq üçün dövlət başçısı cənab İlham Əliyevin rəhbərliyi ilə kifayət qədər lazımi tədbirlər görülür və qərarlar verilir.

Bu sözləri Trend-ə açıqlamasında “İki sahil” qəzetinin baş redaktoru Vüqar Rəhimzadə deyib.
Baş redaktorun sözlərinə görə, Azərbaycan Ordusunun şəxsi heyətinin əhvali-ruhiyyəsi, döyüş qabiliyyəti, maddi-texniki təminatı yüksək səviyyədədir: “Azərbaycan Ordusunun dünyanın 50 ən güclü ordusu sırasında olması adi bir fikir, söz deyil. Hətta el arasında belə bir deyim var: “Ordun varsa yurdun var, ordun yoxsa yurdun yoxdur".
V.Rəhimzadə qeyd edib ki, Milli Ordumuzun güclü, qüdrətli olması işğal altında olan torpaqlarımızın azad olunmasına gedən yoldur:
"Bu baxımdan cənab Prezidentimiz İlham Əliyevin Orduya xüsusi diqqət göstərməsi, dövlətimizin başçısı tərəfindən yüzlərlə hərbi qulluqçunun mənzil-məişət şəraitinin yaxşılaşdırılması istiqamətində atılan ardıcıl addımlar çox vacib məsələdir. Bu baxımdan möhtərəm Prezidentimiz İlham Əliyevin Sabunçu rayonunda hərbçilərə yeni mənzillər verilməsi mərasimində iştirakı və məzillərin orderlərini hərbi qulluqçulara şəxsən təqdim etməsi onlara dövlət səviyyəsində diqqət və qayğının bariz nümunəsidir".